قصة الفارم دي في مصر و حلولها

ايه سر إقبال الصيادلة للحصول عليها و ليه الهوس ده لازم يقف و ليه معظم الجامعات اللي بتقدمها لازم تتوقف الي حين

لما كان في فرص سفر علي وظيفة صيدلي اكلينيكي في السعودية كان هم كل الصيادلة المصريين ان يحصلوا علي تلك الدرجة باي ثمن حتي لو ما اتعلموش حاجة منها او اللي بيتعلموه بعيد عن الحد الأدني من تعلم الصيدلة الاكلينيكية

المهم ياخد شهادة من اي جامعة مكتوب فيها انه معاه PharmD
لان وظائف الصيدلي الاكلينيكي في السعودية حطت شروط للتوظيف أولها تكون معاك درجة PharmD و ثانيها انك تكون عندك خبرة ممارسة للصيدلة الاكلينيكية سنتين في مكان معروف بالصيدلة الاكلينيكية

اذا سر الهوس بها هو السعودية

طيب السعودية استغنت عننا و سعودت الوظائف دي و في وقت قريب قوي كل الصيادلة المصريين المتبقيين فيها لن يتم تجديد عقودهم

بالبلدي كده بح خلاص ، المولد انفض

طب لو البرامج اللي بتقدمها غير مؤهلة و بعيدة عن الحد الادني من المعايير العالمية هل هناك مبرر ان حد يأخدها و يدفع هذه الآلافات المؤلفة فيها من غير ما يتعلم صح
قطعا لا

ايه اللي بيحصل في كل الجامعات المصرية

١- اللي بيدرس مناهجها كلهم غير ممارسين و لا مختصين بالصيدلة الاكلينيكية اصلا الا ثلاث اربع اساتذة في مصر جمعوا بين الممارسة في الماضي و العمل الاكاديمي

٢- سنة التدريب العملي فيها ( اغلب الجامعات اللي خارج القاهرة) بيقوم بدور المدرب أطباء ( علي اعلي مستوي و منهم أطباء عالميين) لكن مش عارفين يعلموا الطلبة مهارات الصيدلة الاكلينيكية بل احيانا بيقفوا يسألوا الطلبة احنا مش عارفين انتم عايزين مننا ايه، و تلاقي التدريب عبارة عن محاضرة في التشخيص و ليس الصيدلة الاكلينيكية
ده غير ان عدد الطلبة في الراوند بيبقي كبير قوي
و لو في صيادلة اكلينيكيين بيقوموا بالتدريب في واحدة من الجامعات اللي خارج القاهرة ( اسكندرية ) فللاسف عدد ايام التدريب محدودة جدا و لكن يميز اسكندرية صراحة ادارة برنامجها في ان البرنامج غير مناسب الا لصيادلة المستشفيات و غير مناسب للصيدلي الحر الطامح لدخول المجال و انه البرنامج الاعلي من حيث الvalue for money بشكل عجيب

٣- لو ساعة التدريب المعتمدة بتتكلف ٤٠٠ جنيه، نجد ان الكلية بتصرف منهم ١٠٠ جنيه فقط علي التدريب و ٣٠٠ بتروح لخزينة الجامعة
و غالبا مكان التدريب ده بيكون ما فيهوش صيدلة إكلينيكية يعني ثلاث اربع الفلوس بتروح علشان سيادتك تصرف علي الجامعة و المبلغ اللي بيتصرف علي تدريبك بيتصرف في في مكان خالي من الصيدلة الاكلينيكية و لو فيه صيدلة اكلينيكية يدوب يشممك المكان ٦ ايام فقط و لو حبيت تروح تتدرب في مكان فيه صيدلة اكلينيكية مطلوب منك تكع زيادة

طيب المحصلة ايه؟
انك عزيزي الخريج بتاخد درجة بفلوس كثير قوي و بتضطر تتفرغ سنتين ( دراسة سنتين مرهقة اكثر من الماجستير ) حياتك بتتشل فيهم دون فائدة لأنك ما اتعلمتش الصيدلة الاكلينيكية علي اصولها علي أيد أصحابها

و الجامعات هتلاقيها همها تخرج دفعات و تستقبل دفعات و خلاص علشان تزود مصادر تمويل الجامعة باي شكل و ده تماشيا مع سياسة الدولة في كل الوزارات انها تتصرف و تجيب فلوس من الناس اللي مخبية فلوسها و مدكناها دي باي وسيلة

ايه الحل:

انك عزيزي الخريج تقاطع تلك الدرجة الي ان يتم تعديل قانون تنظيم الجامعات بالآتي:

١- يكون تعيين أعضاء هيئة تدريس الصيدلة الاكلينيكية من الممارسين لها فقط ( او من مارسوها)
٢- مؤهلات هؤلاء المدرسين الممارسين هي فارم دي محترمة متبوعة بتدريب مقنن محترم او ما يعادله من الخبرة و لا يشترط الحصول علي ماجستير او دكتوراه
( في السعودية اللي غلبتنا في كاس العالم غلبتنا في التعليم برضه علشان بتقلد امريكا و بتتعلم منها صح : اللي حاصل علي فارم دي و بعدها حصل علي و pgy1 ( postgraduate year 1) و حصل علي PGY2 و اتنين research publications او research fellowship بيتعين استاذ مساعد في الصيدلة الاكلينيكية
و لو حاصل علي PharmD و PGY1 فقط بيعين محاضر او مدرس مساعد

٣- مدربين اكلينيكيين في سنة التدريب العملي مستوفين شروط المدرب العالمية مش اي واحد متخرج بالفارم دي و خلاص

طبعا ممكن حد يقولي لي طب نجيب حد معاه المؤهلات دي منين اذا ما كانش عندنا درجات فارم دي محترمة و لا تدريب مقنن محترم

الرد: عدل اللائحة الاول هيجيلك ناس كثير اتعلموا في امريكا يملوا الأماكن دي و أبعت بعثات ناس تتعلم، و ممكن تستعين بخبراء يقيموا الموجودين حاليا من الصيادلة الاكلينيكيين و تختار منهم ناس ينفعوا

الي ان يتم ذلك ، كل فلوس هتدفعها عزيزي الخريج في الدرجة دي هي فلوس ضايعة و جهد علي الفاضي و لن تجد مردود لها في سوق العمل المصري فما تضيعش وقتك

ملحوظة: علي فكرة ده حل يخص جزئية صغيرة قوي في المنظومة الكبيرة الفاشلة

يعني لسه في واجبات كثير لازم تتعمل تخص إلغاء بكالوريوس الصيدلة تماما و استبداله بالفارم دي، و حاجات تخص كيفية الحصول علي ترخيص مزاولة المهنة و كيفية تجديده

و قانون مزاولة المهنة، و اعداد الخريجين و مواويل كثير قوي

المصدر:

لينك البوست علي الفيسبوك