طوربيد 8: النهاية

الطوربيد الاخير

بالبوست ده بتكون نهاية سلسلة بوستات السبوبة و سلسلة الطوربيد

اعتقد اني سيبت موسوعة عن سبوبة الفارم دي و فسرت ليه بقول عليها كده

اتكلمت عن وضع الكليات اللي بتمنح برامج الفارم دي المختلفة بدون ما تكون مؤهلة لذلك لا باماكن تدريب محترمة و لا بمدد كافية و لا بكوادر متخصصة في الصيدلة الاكلينيكية ( علما و ممارسة) واعتماد تلك الكليات علي ستاف مالهمش علاقة بالممارسة في ظل غياب تام للرقابة عليهم و غياب لوضع قواعد صارمة لتدريس الصيدلة الاكلينيكية من قبل اي هيئة في مصر ( لجنة قطاع الصيدلة او الهيئة القومية لجودة التعليم و الاعتماد)

و اتكلمت عن التحديات و العراقيل اللي هيقابلها خريج الفارم دي ( اللي هياخدها من كليات زي المنصورة و طنطا و قناة السويس و كفر الشيخ)

و اتكلمت علي غياب الROI من ورا دفع مبالغ كبيرة في برامج القاهرة و عين شمس اللي تدريبهم احسن كما و كيفا

دكاترة الفارما و الميكرو الاعزاء نقدي اللاذع لكم لا يتناقض مع رأيي ان حضراتكم من اروع الدكاترة اللي درسوا لي و كنتم بتقدموا محاضرات معمول فيها شغل رائع ( بس ما تعرفوش بيتطبق ازاي علي ارض الواقع) و لا يتناقض مع اي رأي سابق مدحتكم فيه قبل كده، بس مواجهة سوق العمل هي اللي ورا نقدي الشديد لكم و لمشاركتكم في تدريس الصيدلة الاكلينيكية و اللي استحالة كنت هعرفها غير بعد مواجهة سوق العمل وكمان في ظل وجود من هم افضل منكم في تدريس الصيدلة الاكلينيكية لانه تخصصهم بس لوايح الجامعات المتكلسة بتمنعهم

استاذنا الكبير د طاهر حجاب كان اول واحد حذر من سبوبات الفارم دي قبلي بكثير

لما نزل البوست بتاعه ده
ساعتها انا كنت في نص دراسة الفارم دي
و البوست بتاعه كان زي طعنة في قلبي علشان كان ضربة جامدة قوي للبرنامج اللي كنت فيه و اللي زيه

و ساعتها د طاهر اتعرض لكمية نقد رهيب ممن هم اقل منه و اقزام جنبه، و ما ردش عليهم
و مديري البرامج انتقدوه انه بيتكلم و هو ما شافش برامجهم ( السبوبة)

و ده اللي خلاني استحمل النقد اللاذع
من الزملاء اللي لسه بيدرسوا في البرامج دي علشان فاهم قوي شعورهم و فاهم معني الالم اللي بوستاتي اتسببت لهم فيه،

انا كل اللي عملته في بوستاتي هو اني اكدت علي اللي قاله د طاهر حجاب و سمعت كلامه في نقطة خد كلامي بحرص لاني بالفعل اكدت علي اللي قاله مع اضافة معلومات اخري مبنية علي مشاهدات و تجارب و رؤية قريبة من كل البرامج اللي اتكلمت عنها

و اللي صنفت علي اساسه البرامج الي ثلاثة:
١- مجموعة ( طنطا، المنصورة، كفر الشيخ، قناة السويس)
٢- اسكندرية و وضعها الخاص ( اللي لا هي سبوبة و لا هي تدريبها كافي بس وضحت السر ورا سمعة خريجيها المرموقة)
٣- مجموعة القاهرة و عين شمس

د طاهر حجاب ، ربنا يعينني زي ما بنتعلم منك العلم، اتعلم منك الصبر علي التجاوز

https://www.facebook.com/1342633255/posts/10210736251746064/

في النهاية انا هسيب سلسلة بوستاتي للي عايز يرجع لها
انا حاولت ادخل عنصر الفكاهة و الالش فيها علشان اوصل فكرة معينة للخريجين بشكل و لغة يحبوها و اللي يعرفني هيعرف اني بعمل اي حاجة بقلب

انا لا املك افكار لحل ازمات المهنة في ظل الاعداد دي فعذرا لو كل بوستاتي ركزت علي المشاكل و الافخاخ اللي هيقابلها خريج صيدلة

ما ينفعش افضل حاطط نفسي في اطار واحد و احبس نفسي فيه مدي الحياة، شغلانة الدعاية زي ما علمتني الاصرار و الروح القتالية فهي علمتني المرونة و عدم حرق البنزين علي الفاضي

هو صحيح حب الالش علي السبوبة و حب اطلاق طوربيدات مغري قوي و اكاد اكون ادمنته لكن آن الاوان اني اطوي الصفحة دي من حياتي و ابدأ صفحة جديدة و اتمني اللي بيحب لي الخير يدعي لي بظهر الغيب

المصدر:
لينك البوست علي الفيسبوك