كيفية استهانة الجامعات بدرجة الفارم دي - السبوبة

كيفية استهانة الجامعات بدرجة الفارم دي


كان يا ما كان في سالف العصر و الزمان
دفعة فارم دي بتتخرج و في حفلة تخرجها اتفاجئوا بنائب رئيس الجامعة لشئون الدراسات العليا بيسخر من الدرجة اللي حصلوا عليها امام اسرهم و ذويهم اللي صبروا و عانوا معاهم لحد ما اخدوا الدرجة و اتكلفوا آلاف مؤلفة و اتبهدلوا في سفر و انواع مشقة مختلفة
علشان يوم فرحهم يتقال لهم هو انا مش عارف الدرجة بتاعتكم دي ايه دبلومة و لا ايه و سألت دلوقتي و انا طالع قالوا لي انها ماجستير مهني
بينما الدرجة دي في بلد منشأها معروفة انها دكتوراه مهنية و اللي بيحصلوا عليها بيستحقوا لقب دكتور

و دي صورة د جوزيف ديبيرو اللي هو صديق عندي علي الفيس انا و كثير من زملائي و هيشوف صورته و اكيد هيتسائل ايه اللي مكتوب علي صورته بالعربي ده
د ديبيرو هو عميد كلية صيدلة Virginia commonwealth university و مؤهلاته
١- بكالوريوس صيدلة
‏٢- Working Pharmacists PharmD و دي اخدها في ٣ سنين part time ، اللي عندنا في مصر سنتين ( سنة منهم علي الاقل full time)
و بعد الدكتوراه المهنية بتاعته PharmD اخد
‏١- Residency
‏٢- Research fellowship

عميد كلية و اسمه علي كل الكتب بتاعة الفارماكوثيرابي اللي دكاترة الفارما الغير ممارسين اللي عمرهم ما تعاملوا مع مريض و لا عندهم الinterest اصلا لذلك بتدرس منها و هو مش معاه لا ماجستير و لا دكتوراه فلسفة PhD

اتمني انه ما يترجمش البوست علشان الراجل كبير و اخاف عليه لما يقرا ان في مصر بيقولوا ان اللي معاه دي مش دكتوراه مهنية و لا هو يستحق لقب دكتور
و لو ترجمته يا د. جوزيف ما تزعلش احنا كده في مصر ده العادي بتاعنا بتوع السبوبة شايفنك مش دكتور و بيهجصوا و يقولوا ان اللي انت واخده ده ماجستير مهني و شايفين الغير ممارسين احسن منك في تدريس الصيدلة الاكلينيكية من كتبك 😂

ده بس علشان حضراتكم تعرفوا ازاي لجنة قطاع الصيدلة بتسخر من الفارم دي في مصر
و مش بتعطيها وزن و لا قيمة و كمان بتسمح للكليات انها تخالف قانون تنظيم الجامعات و بتمنع حملة الفارم دي انهم يسجلوا PhD و بتمنع اللي اخدوا منهم ريزيدنسي او خبرة ممارسة انهم يتعينوا اعضاء هيئة تدريس
و اللي اشتغلوا منهم في التدريس في الجامعات السعودية مش عارفين يعملوا ايه لما يرجعوا مصر

برامج مفتوحة لا عليها رقابة من حد و لا محاسبة من حد و فاتحينها بس لزيادة موارد الجامعة علي قفا المضحوك عليهم من خريجي الصيدلة في مصر