الزمالة المصرية و ازاي بتتحارب

الزمالة المصرية في الصيدلة الاكلينيكية

ايه هي و ليه بتتحارب من الجامعات المصرية و علي رأسها لجنة قطاع الصيدلة في المجلس الاعلي للجامعات

في البوست ده هتعمد اتكلم و ادافع عن شهادة انا ما اخدتهاش و لا ناوي اخدها
و بالتالي اكيد شهادتي مش مجروحة لان ما عنديش مصلحة
( انا اصلا مش بمدح في اللي اخدتهم😂)

اولا علشان نفهم ايه هي الزمالة محتاجين نعرف ازاي الواحد يبقي صيدلي اكلينيكي في امريكا و ازاي يبقي عضو هيئة تدريس صيدلة اكلينيكية في امريكا

الصورة دي بتوضح الحد الادني من المؤهلات الواجب توافرها في عضو هيئة تدريس ممارسة الصيدلة الاكلينيكية في امريكا:

‏١- PharmD ( اللي احلت محل بكالوريوس الصيدلة في امريكا)

ثم

‏٢- Residency و دي عبارة عن تدريب ممنهج و مقنن بعد التخرج من الفارم دي
و دي بتقدمها المستشفيات و بتبقي برامج الريزيدنسي فيها واخدة اعتماد من الASHP ( اختصار American society of health-system pharmacists )

و مش كل الصيادلة بعد التخرج هناك بيلاقوا فرص ريزيدنسي لان الاماكن قليلة و الطلب عليها كبير
و هم بيتنافسوا عليها علشان دي اللي بتؤهلهم للشغل كصيادلة اكلينيكيين حسب طلبات المستشفيات

الريزيدنسي دي في منها نوعين:

نوع اسمه PGY1 و ده اختصار للpostgraduate year 1
لانها اول سنة تدريب مقنن بعد التخرج و بتكون rotations علي تخصصات كثير لمدة سنة ميلادية كاملة و تدريب تحت اشراف و توجيه مدرب صيدلة اكلينيكية اسمه clinical preceptor

النوع التاني ما ينفعش حد ياخده غير لما يخلص الpgy1
و طبيعي يبقي اسمه pgy2
بيبقي سنه برضه لكن في تخصص واحد بس من التخصصات اللي عرفتها الASHP علي موقعها

بعد الPGY1 تبقي مؤهل تشتغل كعضو هيئة تدريس في كلية الصيدلة في الgeneral pharmacotherapy
لكن لو هتدرس تخصص معين يبقي لازم تكون مخلص الpgy1 and pgy2

علشان نتصور قوة الpgy1 دي في اكساب الخريج مهارة فنعرف ان السنة دي توازي ٣ سنين خبرة عمل كصيدلي اكلينيكي

طب لو واحد شغله في الجامعة هيتعدي جزء التدريس و يدخل في الابحاث يبقي لازم بعد ده يبقي معاه حاجة من اتنين يا PhD ( درجة دكتور الفلسفة في التخصص) او research fellowship ( زمالة بحثية و بتبقي برنامج مدته سنتين بيخرج واحد يقدر يقود بحث علمي)

نجد علي سبيل المثال Joseph Dipiro ابو الpharmacotherapy اللي اسمه علي كل الكتب و علي عدد رهيب من الابحاث ده عميد كلية صيدلة Virginia commonwealth university school of pharmacy
مؤهلاته :
PharmD
Residency
Research fellowship

و ده اللي بيسموه Professor of practice في امريكا

ايه علاقة كل الهري ده بالزمالة 😊

الزمالة المصرية في الصيدلة الاكلينيكية ( اللي اسمها هيبقي البورد المصري في الصيدلة الاكلينيكية)

هي برنامج تدريب مقنن مدته ٣ سنين
اول سنتين في تخصصات عامة و اخر سنة في تخصص واحد بتختاره
و مشروع بحثي
بس لازم تاخدها كلها
يعني نقدر نقول انها البديل المصري للpgy1 and pgy2
و اتعملت بهدف تأهيل مدرسين صيدلة اكلينيكية

طيب ليه بتتحارب و في تعمد لافشالها؟
علشان تضارب المصالح

لان معظم الاساتذة في اقسام الصيدلة الاكلينيكية في مصر ( الا فئة قليلة قوي تتعد علي الاصابع ) لم يمارسوا مهنة الصيدلة الاكلينيكية في حياتهم و لا يمارسوها و بالتالي حاجة زي الزمالة تهديد لهم لانها لو اتقننت فدول المفروض يطلعوا out

طب دول ازاي اساتذة صيدلة اكلينيكية و اخدين كمان PhD فيها
اللي واخدينه ده بيسموه في امريكا
PhD in pharmacotherapy outcomes research
مش PhD in clinical pharmacy
لان كلمة clinical pharmacy تقتضي انهم يكونوا اصلا صيادلة اكلينيكيين و هم مش كده

في جهات تانية بقي داخل وزارة الصحة بتتعمد انها تفشلها علشان حاجة لها علاقة بالتدرج الوظيفي و اللي المفروض تدي superiority لحاملي الزمالة
فاللي مش معاه الزمالة، الزمالة تهديد له
فبدل ما يحصل تطوير لها و ياخلوها تاخد دفعتين في السنة في كذا محافظة
بدأت تنكمش و ياخدوا دفعة واحدة في السنة في القاهرة بس

يا تري السعودية اللي قفلت علينا الباب بسبب السعودة فيها ايه؟

فيها برنامج ريزيدنسي زي الزمالة اسمه شهادة التخصصات السعودية في الصيدلة الاكلينيكية
ما ينفعش تمارس الصيدلة الاكلينيكية لو صيدلي سعودي غير لما تاخدها و هي المؤهلة للتعيين كمحاضر صيدلة اكلينيكية في الجامعات
عندهم كمان صيادلة سعوديين معاهم pharmd من امريكا و pgy1 and pgy2 و كمان research fellowship و دول بيتعينوا بدرجة استاذ مساعد في الصيدلة الاكلينيكية

العراق فيها برنامج ٤ سنين اسمه البورد العراقي في الصيدلة الاكلينيكية
و ده هنلاقيه بدأ ينتشر في دول عربية اخري اقتداء بالنظام العالمي

تحية لكل واحد اخد الزمالة و مستحمل الظلم بسبب تضارب المصالح

قبل ما تعاتبوهم علي الاحباط اللي اصابهم نفكر في المسئولين اللي مش قد مسئولية التعليم و لا قيادة المهنة في مصر

ملحوظة: بكرر انا لا معايا زمالة و لا ناوي اخدها و دي شهادة لله

المصدر:
لينك البوست علي الفيسبوك