مستقبل الصيدلة في مصر - السبوبة

مستقبل الصيدلة في مصر


مين اللي ودي صيدلة و الصيادلة في داهية؟
هل اختيار كلية صيدلة لك او لابنك او لبنتك ده اختيار كويس؟

اولا انا ما اعرفش مين في لجنة قطاع الصيدلة بالمجلس الاعلي للجامعات الحالية و لا اللي قبلها و لا اللي قبلها ، انتقادي لقرارتهم مبني علي الوضع اللي وصلنا له و جايز يكون مفروض عليهم فمش هجوم علي اشخاصهم نهائيا
لكن قرارات السماح بالاعداد دي انها تدخل كليات الصيدلة و تتخرج كل سنة هو اللي وصلنا للوضع الاسود للمهنة و هم المسئولين عن خرابها و عن الاحباط اللي بيدخل فيه شباب الصيادلة و الفزع اللي هم فيه

انا هختار لحضراتكم مثالين من الاتحاد الاوروبي ( المانيا و مالطا) و امريكا و نشوف عدد الصيادلة و الخريجين سنويا و نقارنهم مع مصر علشان نفهم لجنة قطاع الصيدلة بتخربها ازاي
الارقام اللي في الجدول بتوضح اننا عندنا كثافة من الصيادلة تفوق ضعف كثافتهم في اسوأ دولة في اوروبا وضعا للصيادلة و هي مالطا
الارقام بتقول اننا بنخرج عدد صيادلة اكثر من امريكا و بمعدل اكثر من ٣ اضعاف معدل تخريجهم في امريكا ( البلد الاكثر تطورا في مهنة الصيدلة و الاكثر توسعا في تخصصات الصيدلة)
الارقام بتقول ان معدل تخريجنا للصيادلة سنويا ٦ اضعاف تخريجهم في المانيا اللي اجمالي الناتج المحلي بتاعها ٣.٦ تريليون دولار ( الرابعة عالميا) و سكانها ٨٢ مليون و فيها ٥٢ الف صيدلي و اللي تعليمها الجامعي مجاني بس بتخرج ٢٠٠٠ صيدلي بس في السنة

طبيعي جدا لما السعودية تكبر و تنمو و تحب توطن الوظائف و نوصل لليوم اللي تستغني فيه عن المصريين في صيدلة المستشفيات و الدعاية نلاقي نفسنا بنلطم في مصر علي شح فرص العمل و علي زيادة العرض علي الطلب و تدني المرتبات اللي بقت اقل من عامل نضافة ( لهم كل الاحترام ) احيانا
لان مرتب الصيدلي الحكومي ٢٠٠٠ او اقل و الخاص ازيد حاجة بسيطة

ما فيش حل جماعي للي اتخرجوا يعملوا ايه لان احنا مش محتاجين غير نص عدد الصيادلة الحالي او اقل لو عايزين نبقي زي مالطا مثلا
الحل في اللي جاي هو عدم قبول اكثر من ١٠٠ طالب سنويا في اي كلية صيدلة
الباقيين يشوفوا اي مهنة تانية او تعليم فني لو لقوا المهن الاخري خربت برضه و ده متوقع
اللي بيخرب المهنة مش اللي بيسلط الضوء علي المشاكل
اللي بيخربها لجنة قطاع الصيدلة او اي مسئول عن العشوائية دي